Fréttir hafa borist með reglulegu millibili frá Gústa á Veraldarleikum flugsins í Torínó. Nú fer að nálgast prófanir á vélinni og því mikilvægt að allt gangi samkvæmt áætlun. Svo virðist þó ekki ætla að vera raunin og lífið í Torínó hætt að vera dans á rósum (leyfir greinarhöfundur sér að velta því fyrir sér hvort dans á rósum hljómi eins illa og hann í raun og veru hljóti að vera). Ágúst sendi fyrr í dag stöðuskýrslu og fylgir hún hér á eftir ásamt tveimur myndum.
Í morgun áttu mótorhlutar og fleira að vera komið til okkar, eins og bensíndæla ofl. Ekki gekk það eftir og í ljós kom að einhver togstreita og pólitík var deiluefni milli fyrirtækisins og stjórnar Heimsleikanna. Á endanum gáfu menn eftir og við fengum afhenta hlutina um þrjúleitið.
Við gengum að mestu frá eldveggnum, sem er nokkuð vesen. Eins voru hurðir klæddar og kláraðar auk þess sem sett var álplata á gólfið. Byrjað var á mælaborði og búið að gera öll göt fyrir mæla og rofa eins og þarf.
Flugvöllurinn fyrir fyrsta flug var fluttur frá því að vera 50km í burtu til að vera í 5km fjarlægð. Málið var að Ítalirnir vissu ekki af vellinum, en Tékki sem ég kynntist síðasta vetur í Sviss hafði lent þarna á heimasmíðuðu Europa vél sinni og geymdi meðan á leikunum stóð. Hann kom auðvitað fljúgandi frá Prag og varð að fara heim í dag. Við hringdum í flugvallareigandann sem gaf góðfúslegt leyfi fyrir notkun vallarins. Það kemur því í ljós í flugprófunum á laugardag hvort flogið verði inn á Torino flugvöll þar sem aðalstöðvarnar og lokahátíðin verður, eða hvort vélin verði flutt þangað með flutningabíll.
Það er afar mikilvægt að okkar mati að vélin verði á Torino flugvelli, svo það er allt leyst.
Einn af áhorfendunum sem hefur hangið yfir okkur í dag kemur frá suður Ítalíu. Hann hefur aldrei áður komið svona nálægt smíði á flugvél áður og hefur því setið yfir okkur í allan dag. Þessi kom eingöngu til að sjá okkur smíða Skyrangerinn. Hannn mútaði okkur með ís á línuna, svo við leyfum honum að fylgjast með yfir öxlina á okkur.
Á morgun föstudag er síðasti dagurinn í smíðinni og við munum klára allt. Það er mjög skemmtilegt að sjá að allt er unnuð mjög vel, hvergi kastað til höndunum í smíðinni og allt mjög vel gert.
Kveðja frá Tórínó,
Ágúst Guðmundsson
